كيف استطيع ان ابدا مشروع وانا لا املك رأس مال ..الحلقة الاولي .

السلام عليكم ...طبعا حاشرح الموضوع علي هيئة حلقات ونتخيل معاكم قصة شاب باحت عن العمل .
صديقنا محمد عمره 27 سنة متخرج من كلية الهندسة قسم هندسة كهربائية وهو مجال من افضل المجالات واصعبها علي الاطلاق وفي ظل الضروف الصعبة للدولة الليبيه فلم يستطيع الحصول علي عمل في الشركة العامة للكهرباء وللاسف ليس لدينا شركات خاصة  وفي نفس الوقت هو ما يفهمش في كهرباء المنازل ..محمد لية سنتين متخرج وقاعد في المنزل ومن قهوة لقهوه هو وصحابة وكل ما يفكر يبدا بمشروع يتدكر انه من عائلة كادحة وما عنداش راس مال باش يبدا مشروع وقاعد ياخد في مصروفه من بوه 5 دينار في اليوم واللي هو 150 شهريا وحاس روحه انه متقل علي عيلته ماديا وكل ما يخش السوق المفتوح يدور علي خدمه ياما يلقي مسوق اي عمل في محل ملابس او سوبرماركت وبمرتب بسيط وهو يشوف في روحه الباش مهندس محمد اللي كافح وتخرج من مجال صعب ومهم مش متخيل يخدم في اماكن زي هادي لان هو قرا 5 سنوات وتعب باش يخدم في اماكن افضل لانه لو كان يبي يخدم في االاماكن هادي لكان ماخشش الجامعه من الاساس وليه قريب 7 سنين يخدم وممكن حتي لقط حق ارض في عين زاره او وادي الربيع وبادي حتي يبني ويفكر في الزواج .
محمد حاليا خاش في حالة نفسيه  ومتلخبط ومعاش عرف شن ايدير والعمر ماشي وخاش في احباط ويشوف في الشباب اللي في شارعهم اصغر منه بسنين ومش قارين حتي الجامعه بسيارات وفلوس رغم انهم نفس الضروف الماديه متع عيلته ولكن جيرانهم اغلب صغارهم خشو للكتائب ويحصلو في مرتبات وهما يمشو يوم في الاسبوع وفي حتي اللي ما يمشيش .
وقتها محمد عرف انه في دولة ما تقدرش في العلم والشهادة اللي حصلها عبارة عن ورقة علي قولة بعض الناس باش وين تمشي امك تخطبلك تقول مهندس ولا دكتور .
كان هذا حال المهندس محمد مالا كيف حال باقي الشباب الليبي اللي زي محمد اللي اجتهدو وتخرجوا من افضل الكليات باش يخدمو بلادهم وللاسف هما اعمارهم فاتت الربع قرن وما عندهمش ولا مصدر دخل ..طبعا نقصد الشباب اللي يخافوا ربي ويبوا يبدو حياتهم بالحلال .
المهم يوم من الايام خاش محمد للصيدلية بيجب دواء لحوشهم لقي سعر الدواء زايد هلبا فشرحله الصيدلي انه سعر الدواء زايد من شركات الادوية ومش السبب من الصيدلية ..طبعا محمد اكتشف ان الصيدلي حتي هو طبيب ومتخرج لية سنتين ولكن مش محصل تعيين فيخدم في صيدلية باش يطلع مصروفه ...وقال الدكتور كلمة مشابهه لكلمة محمد وين قالوله اخدم في محل ملابس او سوبرماركت مواد غدائية وين قال انا لو كنت نبي نخدم هكي علاش ضيعت 5 سنين من عمري في الهندسة ..المهم الدكتور قال لو كنت نحساب هكي لكنت خشيت معهد صيدلة خاص بعد التانوي سنتين وما كنتش ضيعت 7 سنين من عمري في الطب ..المهم المهندس والدكتور مع الوقت صار ما بينهم صحبة وبدوا يفكروا مع بعض كيف ايديرو حل لمشكلتهم ويلحقوا علي العمر اللي يفوت ..وحنحكيلكم شن صار معاهم في الحلقة الجاية ان شاء الله ..تصبحوا علي خير
بقلم : احمد القريو

كيف استطيع ان ابدأ مشروع وانا لا املك رأس مال ...الحلقة التانية .
كيف ابدأ مشروع وانا لا املك رأس مال ..الحلقة الثالثة .